Sustainable Resource Management: ULIMO LOLONDOLOZO
yokwenza epheleleyo
Ulimo loLondolozo ligama elinikezelwe kwinkqubo yolimo olugcinekayo olungabuy’ umva lweenkqubo zolimo eziqhelekileyo. Sithetha ukuthini xa sisithi “ukugcineka”? Inkcazelo yethu yeyokulima ngendlela engonakalisi okusingqongileyo enokuthi isetyenziswe kwixesha elide elizayo.
Ulimo loLondolozo lwenziwa ngamalungu amathathu:
- Lulimo oluncinci okanye olungekhoyo
- Ugcino lwesikhondo sesityalo emhlabeni
- Ubolekiswano lwesityalo
Lulimo oluncinci okanye olungekhoyo
Izixhobo ezinamazinyo
Xa kungekho limo okanye luluncinci ayilinywa umhlaba. Endaweni yokulima nokuhlwayela, imbewu kunye nesichumiso zihlwayelwa ngqo kwisikhondo sesityalo sangaphambili. Oku kwenziwa ngesixhobo ezinamazinyo okanye iincakuba zentsimbi endaweni yezabiwo zekhuba lesithethe. La mazinyo enza ifolo apha emhlabeni, apho igalelwa khona imbewu kunye nesichumiso. Le folo ibuya izivale ngokwayo emva kokuba liqhubele phambili izinyo. Akukho limo luthintela ukuthotywa kobume bomhlaba kuba ungalinywanga kwaye ungacolwanga.
Isichumiso kunye nembewu zigalelwa ngqo efolweni emhlabeni, kubunzulu obulungele isityalo eso silinywayo. Umhlaba, ngamanye amagama usetyenzwe kakanye kuphela, unciphisa indleko zokuvuna.
Ugcino lwesikhondo sesityalo emhlabeni
Ukuba sigciniwe isikhondo, sithintela ukhukuliseko lomhlaba ngumoya namanzi. Kwakhona sikthintela amaqondo obushushu aphezulu omhlaba, obuthintela ukutshatyalaliswa zizilwanyana ezincinci eziphila emhlabeni.
Esi sikhondo sikwathintela ukwenzeka komphunga wokufuma komhlaba kwaye oku kufuma kuza kusetyenziselwa ukwehlisa umgquba emhlabeni, onempembelelo ewutyebisayo. Imisundulu inako ukuphila emhlabeni phantsi kwezi meko, kwaye ziza kunceda ekuhliseni umgquba.
Ubolekiswano lwesityalo
Ubolekiswano lwesityalo lubhekiselele ekuvunweni kwezityalo ezahlukileyo kumhlatyana othile; ngamanye amagama kwasona esi sityalo sinye asisayi kuvunwa minyaka le. Ngokwenza ubolekiswano lwezityalo umhlaba awusayi kudinwa kwaye ufumana ithuba lokuhlaziyeka. Kwakhona ubolekiswano lwezityalo lukwathetha ukuba izityalo ezibuyisela inayitrojini emhlabeni, ezifana nesoya okanye iimbotyi, ziza kuba yinxalenye yenkqubo yobolekiswano lwezityalo. Oku kuthetha ukonga kwisichumiso.
Iinkqubo zolimo oluqhelekileyo
Iinkqubo zolimo “Oluqhelekileyo” ngokwale meko zibhekiselele kwiinkqubo zokuhlwayela nezokulima zesithethe. Oku kuquka ukutshiswa kwesikhondo. Iinkqubo zolimo oluqhelekileyo ziquka oku kulandelayo okungalunganga:
Ukhukuliseko lungabonwa
ngokucacileyo kule foto.
- Ukuguqulwa komhlaba, ukutshabalalisa ukhula kunye nokulungiselela imbewu ibhedi, kukhokelela kumphezulu ongagqumekanga apho ukhukuliseko lomhlaba lusenokwenzeka khona.
- Ngexesha lokuguqulwa komhlaba, kuye kuphume umongo-moya (CO2), othi ukhokelele ekuncitshisweni kwekhabhoni emhlabeni. Khumbula ukuba ikhabhoni yenza isiseko seenkqubo ezibubhayoloji neziphathekayo, nezamachiza emhlabeni. Ngaphandle kwekhabhoni, akukho nanye inkqubo kwezi enokwenzeka.
- Ukulahleka kwe-CO2 kungathelekiswa nokutsha komgquba emhlabeni, okhuphela emoyeni i-CO2 ebalulekileyo. Umvelisi uphujlukana nalo mthombo uxabisekileyo wekhabhoni.
- I-CO2 ekhutshiweyo iya phezulu emoyeni ize ibe negalelo ekutshiseni komhlaba nakwimpembeleo yendlu eluhlaza.
- Umgquba osemhlabeni uvela ngaphandle ufunyanwe lilanga emva koguqulo lomhlaba, apho woma khona kwaye uthathwa njengongenamsebenzi ekutyebiseni umhlaba.
- Iqondo lobushushu bomhlaba liphakanyiswa lilanga kwaye izilwanyana ezincinci eziphila emhlabeni azingeke ziphile. Ukuhamba ngenyawo kumhlaba oshushu kungavakala ngokucacileyo!
- Iindleko zezinto ezisetyenizswa kwimceliso ziphezulu kakhulu kunolimo lolondolozo, kuba iinkqubo zoomatshini bentsimbi zifuneka.
- Ukutshiswa kwesikhondo kutshabalalisa ukhuseleko oluxabisekileyo lomphezulu womhlaba kwaye lusenokwenzeka ukhukuliseko lomhlaba ngumoya namanzi. Ukhukuliseko lomhlaba olumalunga neetoni ezingama-700 kwihektare nganye luye lwashicilelwa ngexesha elinye nje lezantyantyala zemvula.
- Ngaphezulu nje kokulahleka komhlaba, ongenakubuyiselwa, imbewu esanda kutyalwa kutsha nje isenokukhukuliseka, nto leyo enokukhokelela kwimveliso ephantsi.
- Kwakhona ukutshiswa kwesikhondo kunqanda ukutyebiseka komhlaba ngenxa yentsalela yesityalo ebesifanele ukuthotywa kwaye besinokwandisa isiqulatho somgquba womhlaba.
- Ukulima nako kusenokukhokelela ekomiseni umhlaba kwaye isiphumo sokuphulukana nokufuma sisenokuthetha ukuba umfama ufanele ukuba alinde kude kufike enye imvula phambi kokuba abe nokukwazi ukulima.
Ulimo lolondolozo
Umhlaba osempilweni
Kwelinye icala, ulimo lolondolozo, lunoku kulandelayo okulungileyo, hayi ukwenzela umvelisi kuphela, kodwa ukwenzela ukusetyenziswa kwakhona komhlaba kwixesha elizayo ukwenzela ukulima:
- Umhlaba, oyeyona nto yethu inkulu esisiphiwo, ukhuselwa kukhukuliseko nasekutshatyalalisweni kobume bawo.
- Ukhukuliseko oluncitshisiweyo lunceda ekugcineni ekugcineni imithombo yamanzi icocekile, kuba kwenzeka intlenga encinci emanzini.
- Oku ekugqibeleni kunceda ekunqandeni ekuhluzeni amadama ethu kwaye kunegalelo ekunciphiseni iindleko xa amanzi efanele ukucocwa ukwenzela ukuba aselwe ezixekweni nasezidolophini.
- Isiqulatho sokufuma komhlaba siyakhuselwa kwaye sinceda ekugcineni iinkqubo ezibubhayoloji emhlabeni. Oku kukhokelela kwisiqulatho somgquba womhlaba esandisiweyo nesenza umhlaba utyebe ngakumbi kwaye ube nemveliso.
- Isiqulatho sekhabhoni siyandiswa, kwaye, nanjengoko sele kuphawulwe, ikhabhoni sisiseko sazo zonke iinkqubo ezibubhayoloji neziphathekayo kunye nezamachiza emhlabeni.
- Ubolekiswano lwesityalo lunceda ekubuyiseleni inayitrojini emhlabeni, nto leyo ekhokelela kuncumiso oluncitshisiweyo.
- Ulimo oluncinci luthoba iindleko zoomatshini ngendlela emandla. Iitrekta ezincinci zisenokusetyenziswa kuba izixhobo ezinamazinyo entsimbi zifuna amandla amancinci kunokulima ngokwesithethe, kodwa luyafuneka ulimo oluphantsi, nto leyo ekukonga okukhulu umvelisi.
- Ulimo lolondolozo lububuchule obunokuthintela ukuthotywa kwemihlaba okanye lusenokunceda imihlaba ethe yathotywa ngaphambili ekubeni ihlaziyeke. Kwakhona lusenokuthintela ukwenziwa komhlaba intlango, nto leyo eyingxaki ekhulayo kwihlabathi.
- Kwakhona ulimo lolondolozo lusenokunceda ekupheliseni indlala, kwaye lusenokunceda ekuveliseni ukutya okuninzi ngeli lixa lukhusela izibonelelo zethu zendalo.
Malunga nolwazi oluthe vetshe nceda qhagamshelana neSebe lezoLimo: eNtshona Koloni kwinombolo yomnxeba engu-021 808 5366.
