home about contact us news
Inligtingstukke   |   Elsenburg infopaks   |   Meganisasie: 6

Draadheinings Engels | Xhosa

Kliek om te vergroot!		 Die minimum spesifikasies vir binneheinings vir verskillende veesoorte is soos volg:

Draadheinings vir grootvee

  • ’n Minimum hoogte van 1200 mm
  • Die getal lyndrade wissel tussen 5 en 8

Kliek om te vergroot!		 Draadheinings vir kleinvee

a) Slegs skape

  • ’n Minimum hoogte van 900 mm
  • Die getal lyndrade wissel tussen 5 en 7

b) Gemengde kleinvee (skape en angorabokke)

  • ’n Minimum hoogte van 1050 mm
  • Die getal lyndrade wissel tussen 7 en 9

Kliek om te vergroot!		 Draadheinings vir gemengde groot- en kleinvee
  • ’n Minimum hoogte van 1200 mm
  • Die getal lyndrade wissel tussen 6 en 10

Enige kombinasie van gladde- en doringdrade kan vir grootvee, kleinvee of gemengde groot- en kleinvee gebruik word.

Kliek om te vergroot!		 Wildwerende heinings

Wild word vir dié doel in die volgende drie groepe ingedeel:

  • Groep 1 sluit in koedoe, eland, rooibok, waterbok en buffel. Die groep vereis ’n 2,4 m hoë heining met 21 lyndrade.
  • Groep 2 sluit in gemsbok, rooihartbees, wildebees, swartwitpens en kwagga. Die groep vereis ’n 1,8 m hoë heining met 16 lyndrade.
  • Groep 3 sluit in blesbok, bontebok, springbok, ribbok en ander klein wildsoorte. Die groep vereis ’n 1,4 m hoë heining met 13 lyndrade.

Ogiesdraad in ’n wildheining moet 1200 mm wyd wees en aan die grond geanker word.

Kliek om te vergroot!		 Ogiesdraadheinings vir die skeiding van binnekampe

Die volgende voorbeeld dien ter illustrasie: ’n Heining van 1200 mm benodig die volgende - 900 mm wye ogiesdraad; 3 lyndrade om die ogiesdraad in posisie te hou; 2 lyndrade bokant die ogiesdraad; 2 lyndrade bokant die ogiesdraad indien dit aan die grond geanker is.

Kliek om te vergroot!		 Jakkalsheinings

Dit benodig ’n minimum hoogte van 1350 mm en die minimum hoogte van die bo-ent van die ogiesdraad bokant die grondoppervlakte is 750 mm. Die ogiesdraad moet op die onderste draad vasgemaak word. Daar kan ’n ry klippe onder die onderste staaldraad gepak word om te verhoed dat die ogiesdraad en staaldraad in die grond lê en roes veroorsaak.

Die wydte van die ogiesdraad is verkieslik 1200 mm alhoewel 900 mm ook aanvaarbaar is. Met ’n wydte van 1200 mm word 4 lyndrade benodig om ogiesdraad in posisie te hou en 3 lyndrade bokant die ogiesdraad. Lyndrade bokant ogiesdraad moet verkieslik uit doringdraad bestaan. Die maksimum spasiëring van die lyndrade bokant die ogiesdraad is 100 mm. ’n Spasiëring van 75 mm is egter verkieslik.

Kliek om te vergroot!		 Voorafgeweefde heinings

Spesifikasies vir trek- en lynpale is dieselfde as vir draadheinings. Sparre is nie nodig nie. Die afstand tussen lynpale in ’n veeheining is 16 m en ’n wildheining 10 m. Lyndrade om die geweefde heining in posisie te hou is nie nodig nie. Veewerende voorafgeweefde heinings mag vir veeheinings gebruik word. Hierdie tipe heining is egter nie jakkalsdig nie.

Kliek om te vergroot!		 Omheiningsmateriaal

a) Trek-, hoek- en hekpale

  • Die minimum dieptes waarop trek-, hoek- en hekpale geplant behoort te word en die paallengtes, is in die handel beskikbaar. In ’n veeheining mag ’n trek nooit langer as 500 m en in ’n wildheining nie langer as 300 m wees nie. Alle hekpale moet behoorlik geanker word. Trekpale moet minstens na een kant geanker word en lyndrade minstens twee keer om die trekpaal gedraai en vasgemaak word.
  • Houtpale: Houtpale moet die SABS-merk vertoon, met ’n deursnee van 120 mm aan die dun ent.
  • Ysterpale: Die pale moet ’n massa van minstens 10 kg/m besit in geval van die spoorseksie. In geval van pype moet dit nie kleiner as 100 mm in deursnee wees nie met wande nie dunner as 3,65 mm met ’n staalplaatvoetstuk van 300 mm x 300 mm x 3 mm en ’n metaalkappie bo-op. Dit kan egter ook met beton gevul word sonder ’n metaalkappie.

b) Lynpale

  • Die minimum dieptes waarop lynpale geplant behoort te word en paallengtes is in die handel beskikbaar. In ’n veeheining mag lynpale nie verder as 20 m van mekaar en in ’n wildheining nie verder as 15 m van mekaar wees nie.
  • Houtlynpale: Die deursnee van ’n houtlynpaal vir ’n veeheining behoort minstens 70 mm aan die dun-ent te wees. Die aanbeveling is egter 75 mm tot 100 mm. Die deursnee van ’n houtlynpaal vir ’n wildheining behoort minstens 75 mm aan die dun-ent te wees, maar 100 mm word aanbeveel.
  • Ysterlynpale: I- of Y-seksie ysterlynpale met ’n massa van 3 kg of 2,5 kg/m onderskeidelik word aanbeveel. Vir Y-seksie pale in ’n wildheining moet elke vyfde paal met ’n 50 mm deursnee pyppaal ondersteun word.
  • Aluminiumallooi lynpale: Die deursnee van ’n paal moet nie minder as 70 mm wees nie.

c) Sparre

  • Die lengte van sparre moet ooreenstem met die hoogte van die heining. ’n Minimum van 4 sparre tussen lynpale is nodig. Vir ’n veeheining is die maksimum spasiëring 4 m en vir ’n wildheining 3 m.
  • Houtsparre: Behandelde sparre met die SABS-merk word aanbeveel. Die deursnee aan die dun-ent moet minstens 30 mm wees.
  • Ystersparre: Rifrug of CG-tipe ystersparre word aanbeveel. In ’n wildheining kan twee yster- of houtsparre as een spar gebruik word deur die een bokant die ander te plaas en waar dit oormekaar kom, saam aan die middelste draad of drade vas te bind.
  • Gevalvaniseerde draadsparre: Die aanbeveling is ’n dubbelgedraaide gegalvaniseerde draadspar van 4 mm of 3,15 mm met ’n maksimum spasiëring van 4 m. As alternatief ’n enkeldraad van dieselfde materiaal wat nie verder as 2 m van mekaar geplaas word nie.
  • Aluminiumallooi draadsparre: ’n Dubbelgedraaide draadspar van 4,5 mm of 4,06 mm of 3,15 mm met ’n maksimum spasiëring van 4 m word aanbeveel.

d) Binddraad

  • Gegalvaniseerde sagte draad van minstens 1,6 mm dikte word aanbeveel.

e) Ankerdraad

  • Gegalvaniseerde sagte staaldraad met ’n minimum deursnee van 3,15 mm of aluminiumallooi draad met ’n minimum deursnee van 3,1 mm word aanbeveel.

f) Gegalvaniseerde ogiesdraad

  • Ogies in die ogiesdraad moet 75 mm tot 90 mm wees en die deursnee van die draad moet nie minder as 1,8 mm wees nie.

g) Lyndrade

  • Lyndrade mag of doring- of gladde- of ’n kombinasie van doring- en gladdedraad wees. Die boonste en onderste lyndrade in ’n wildheining moet hoogspanningsdrade wees met ’n minimum deursnee van 2,24 mm of ’n ovaalseksie van 2 mm x 2,6 mm.
  • Vir wildheinings word lyndrade vanaf die grondoppervlakte deurgaans op 114 mm gespasieer. Vir jakkalsheinings is die spasiëring bokant die ogiesdraad soos volg: 75 mm vir ogiesdraad op ’n hoogte van 750 mm tot 1050 mm; 75 mm tot 100 mm vir ogiesdraad hoër as 1050 mm.

A Erasmus
ELSENBURG / GRAAFF-REINET grondbewaring