Home: Information sheets
Inenting teen veesiektes
Also availabe in English | Xhosa
Elkeen van ons is kleintyd geënt teen siektes. Baie van ons dra nog die merke van die entteken op ons bo-arms. Dit is gedoen sodat ons liggaam weerstand kan opbou teen aansteeklike siektes soos pokkies.
By diere gebeur dieselfde ding. As ek my dier inent, bou sy liggaam weerstand op teen siektes soos besmetlike misgeboorte, knopvelsiekte, miltsiekte en lamsiekte. Ons stem dus saam dat diere ingeënt moet word. Met inenting moet ons egter die volgende onthou:
- Die veeboer moet sy diere wat hy wil inent, vroegtydig bymekaarmaak en hulle voor en na ent rustig hou. Onnodige spanning tydens enting kan probleme veroorsaak.
- Die entstowwe wat ons wil gebruik mag nie in direkte sonlig of by hoë temperature gebêre word nie. Dit veroorsaak dat die entstof minder doeltreffend is en nie die gewenste uitwerking op die dier sal hê nie.
- Die naalde en spuite waarmee ons gaan inent, moet vir ongeveer 10 minute in kookwater gekook word om dit heeltemal vry van kieme te maak. Nadat die naalde en spuite gebruik is, moet dit weer skoongemaak word om te keer dat dit roes. Vuil toerusting kan ook besmetting versprei.
Lees asseblief die aanwysings op die entstofbottel baie goed. Moet nie ’n entstof na die vervaldatum gebruik nie. Dit het geen waarde nie en jy bluf net jouself.
Entstowwe kan gekoop word by landboukoöperasies of by privaat veeartse. Hulle sal jou ook raad gee oor watter entstowwe om te gebruik.
Onthou - saam met die gebruik van entstowwe gaan die boer se bestuur van sy diere. Dit beteken goeie voer en weiding, skoon water, ’n skoon melkplek en skoon stalle.
G Brand
ELSENBURG Veterinary Services
